ഇതുവരെയും വഴിപഠിക്കാൻ കഴിയാത്ത മഞ്ഞത്തെരുവ് കണക്കെയാണ് നീയെനിക്ക്.

ഇനിയും പിടികിട്ടാത്ത
ഇടവഴികളും, ഇന്നോളം കണ്ടിട്ടില്ലാത്ത കുറുക്കുവഴികളും

അതിൽ,
പൊടുന്നുടനെയുള്ള തിരിവുകളും, പ്രതീക്ഷിക്കാത്ത വഴിയവസാനങ്ങളും!

എങ്കിലും നിന്നിൽ തന്നെയാണല്ലോ
ഞാനിപ്പോഴും വഴി തെറ്റി
നടക്കുന്നതെന്നുള്ള
ഓർമയാണെന്നേ
മുന്നോട്ട് നടത്തുന്നത്.

പ്രണയത്തിൻ്റെ പകൽക്കിനാക്കളിലൊന്നാണ്
പാതിരാത്രിയിൽ പങ്കുവെയ്ക്കുന്ന
പൊരിച്ച പാതിമുറിച്ച മുട്ടബ്രെഡുകൾ.

നിന്നെ കാത്തിരിക്കുമ്പോൾ
ദിവസങ്ങൾ ഇങ്ങനെയാണ്
കരകാണാ കടലിനോളം
നീളമുള്ളതാകുന്നത്.

അയാളുടെ ചോദ്യത്തിന്
അവളുടെ കണ്ണുകളിൽ
തിരവറ്റിപ്പോയ കടലിന്റെ
നിശബ്ദ നിറഞ്ഞ് നിന്നു.

അറിയില്ല നിന്നെക്കുറിച്ച്
എന്തെഴുതണമെന്ന്.

മരങ്ങളക്കിടയിലെ
മരീചികയാണെന്ന്
മാത്രമറിയാം.